Viti 2025 u dominua nga rritja e shpejtë e inteligjencës artificiale, e cila nga një mjet i përdorur kryesisht nga ekspertët, u shndërrua në pjesë të përditshme të aplikacioneve dhe pajisjeve që përdorin miliona njerëz. Me këtë zhvillim u rrit edhe përmbajtja “sintetike” – foto, video dhe tekst i krijuar nga AI – duke e bërë gjithnjë e më të vështirë dallimin mes materialeve reale dhe atyre të gjeneruara. Shefi i Instagram-it, Adam Mosseri, paralajmëroi se situata do të bëhet edhe më sfiduese në vitin 2026, pasi përdoruesit do të duhet të kalojnë nga besimi automatik te skepticizmi i vazhdueshëm për atë që shohin online.
Mosseri thekson se platformat sociale duhet të evoluojnë, duke sinjalizuar qartë përmbajtjen e krijuar nga AI, duke verifikuar autenticitetin dhe duke promovuar origjinalitetin. Në një botë ku çdo imazh mund të jetë i përsosur falë inteligjencës artificiale, papërsosmëria dhe spontaniteti do të bëhen shenja të besueshmërisë. Ai thekson se njerëzit duhet të mësojnë të kontrollojnë burime, të analizojnë kush po ndan përmbajtje dhe pse, për të mbrojtur veten nga keqinformimi dhe manipulimi digjital.