Heidi Klum e ka surprizuar djalin e saj Henry me një dhuratë të jashtëzakonshme për ditëlindjen e 21-të – një Ferrari të kuq. Momenti kur Henry pa për herë të parë makinën u publikua në Instagram, ndërsa reagimi i tij tregoi se nuk e priste aspak surprizën.
Por Ferrari nuk ishte thjesht një dhuratë luksoze. Pas tij fshihej një histori që kishte nisur rreth shtatë vjet më parë, kur Henry ishte vetëm 14 vjeç. Ai dhe njerku i tij, Tom Kaulitz, kishin bërë një bast gjatë një loje Mario Kart: nëse Henry fitonte, Tom do t’i dhuronte një Ferrari kur të mbushte 21 vjeç. Henry fitoi dhe Kaulitz nuk e harroi premtimin.
Në fakt, bashkëshorti i Klum e kishte blerë Ferrarin që vitin e kaluar në një panair automobilistik dhe e kishte mbajtur të fshehur në garazh deri në ditëlindjen e Henryt. Kur makina iu zbulua, 21-vjeçari mbeti pa fjalë, ndërsa Klum kujtoi me emocion se sa vite kishte pritur djali për këtë moment.
Historia ka tërhequr vëmendje jo vetëm për vlerën e makinës, por edhe për marrëdhënien e afërt të Tom Kaulitz me fëmijët e Heidi Klum. Kitaristi i Tokio Hotel, i cili u martua me Klum në vitin 2019, është përshkruar si një figurë e dytë atërore në familje.