Një grua 65-vjeçare përfundoi në urgjencë vetëm pak ditë pasi mori pjesë në dasmën e vajzës së saj, pasi përjetoi dhimbje në gjoks dhe vështirësi në frymëmarrje. Fillimisht, mjekët dyshuan se ajo po pësonte një atak në zemër, por analizat zbuluan një gjendje shumë më të rrallë, të njohur si “sindroma e zemrës së lumtur”.
Rasti është publikuar në revistën shkencore Oxford Medical Case Reports. Edhe pse simptomat ngjanin me ato të një infarkti, mjekët nuk gjetën bllokim të enëve të gjakut. Në vend të kësaj, konstatuan një zgjerim të pazakontë të barkushes së majtë të zemrës, i cili dobëson përkohësisht aftësinë e saj për të pompuar gjakun.
Kjo gjendje, e njohur si kardiomiopatia Takotsubo (TTS), mund të shkaktohet nga emocione shumë të forta, qofshin ato negative apo pozitive. Kur nxitet nga gëzimi i madh, si një dasmë apo lindja e një fëmije, quhet “sindroma e zemrës së lumtur”, ndërsa kur shkaktohet nga trishtimi ose stresi njihet si “sindroma e zemrës së thyer”.
Sipas studiuesve, vetëm rreth 4% e rasteve të Takotsubo-s lidhen me emocione pozitive, çka e bën këtë fenomen jashtëzakonisht të rrallë. Megjithatë, edhe pse është zakonisht e kthyeshme, gjendja mund të jetë serioze dhe kërkon trajtim të menjëhershëm.
Fatmirësisht, 65-vjeçarja u shërua plotësisht dhe rikuperoi funksionin normal të zemrës. Mjekët theksojnë se edhe emocionet e forta pozitive mund të ushtrojnë stres mbi zemrën, ndaj simptoma si dhimbja në gjoks apo vështirësia në frymëmarrje nuk duhen neglizhuar, pavarësisht shkakut emocional.