Brendi amerikan Ford ka njoftuar një kthesë të fortë strategjike, duke ulur ndjeshëm investimet në automjetet elektrike dhe duke regjistruar një humbje prej 19,5 miliardë dollarësh nga këto projekte. Vendimi shënon një nga tërheqjet më të theksuara të industrisë automobilistike nga zhvillimi i automjeteve tërësisht elektrike.
Kompania do të ndërpresë prodhimin e disa modeleve elektrike, përfshirë F-150 Lightning, kamionin elektrik T3 dhe furgonët elektrikë për përdorim komercial, si dhe ka anuluar bashkëpunimin për prodhimin e baterive me kompaninë koreano-jugore SK On.
Në fokusin e ri të Fordit do të jenë automjetet hibride dhe teknologjia EREV, e cila kombinon energjinë elektrike me një gjenerator benzine për karikimin e baterisë. Synimi është që deri në vitin 2030, gjysma e shitjeve globale të përbëhet nga hibride, EREV dhe automjete elektrike, nga 17% sa është aktualisht.
Ky riorientim vjen si reagim ndaj ngadalësimit të tregut të EV-ve në SHBA, i ndikuar nga heqja e subvencioneve shtetërore dhe ndryshimet në politikat e emetimeve. Pas përfundimit të lehtësimit tatimor prej 7.500 dollarësh, shitjet e automjeteve elektrike ranë me rreth 40% gjatë muajit nëntor.