Një nga surprizat më të mëdha të Oscars 2026 ishte fitorja e Sean Penn për Aktorin më të Mirë në Rol Dytësor, për filmin “One Battle After Another” , por aktori nuk ishte i pranishëm për ta marrë çmimin personalisht.
Emrin e tij e shpalli Kieran Culkin, i cili mori statujën në emër të tij dhe me humor tha se Penn “nuk mundi ose nuk deshi të ishte aty sonte”.
Me këtë fitore, 65-vjeçari fitoi Oscar-in e tretë në karrierë, duke u barazuar me legjenda si Jack Nicholson dhe Daniel Day-Lewis. Ai më parë ka triumfuar për rolet në “Mystic River” dhe “Milk”.
Mungesa e tij në ceremoninë më të madhe të Hollywood-it ngriti pikëpyetje, veçanërisht pasi ai nuk u shfaq as në Actor Awards të organizuar nga SAG-AFTRA më herët këtë muaj. Deri tani, nuk ka një shpjegim zyrtar për mungesën e tij.