Sean Ono Lennon, djali i legjendës së The Beatles, John Lennon, dhe Yoko Ono, është bërë baba për herë të parë në moshën 50-vjeçare.
Sean dhe partnerja e tij prej shumë vitesh, muzikantja dhe modelja Charlotte Kemp Muhl, 39 vjeçe, njoftuan më 1 shtator ardhjen në jetë të djalit të tyre, të cilin e kanë quajtur Aurelius. Lajmin e ndanë në rrjetet sociale, së bashku me fotografitë e para të vogëlushit.
Çifti është së bashku që nga viti 2007, ndërsa ishte njohur dy vjet më herët në festivalin Coachella. Përveç lidhjes së tyre, Sean dhe Charlotte kanë bashkëpunuar edhe në muzikë, përfshirë grupin The Ghost of a Saber Tooth Tiger.
Urimet për prindërit e rinj nuk munguan. Mes artistëve që reaguan publikisht ishin Patti Smith, Willow Smith dhe Dominic Fike.
Sean ka ndjekur prej vitesh gjurmët muzikore të babait të tij të famshëm, duke publikuar albume solo, duke bashkëpunuar me nënën e tij Yoko Ono dhe duke punuar si producent edhe për artistë të njohur. Tani, në moshën 50-vjeçare, ai nis një kapitull krejtësisht të ri, atë të të qenit baba.