Shkencëtarët kanë zbuluar dy faza kritike të procesit të njohur si Kriza e Salinitetit të Mesdheut, e cila ndodhi rreth 6 milionë vite më parë dhe pothuajse shkaktoi zhdukjen e plotë të detit Mesdhetar. Ky proces u shkaktua nga përplasja e pllakave kontinentale europiane dhe afrikane, duke bllokuar hyrjen e ujit nga Oqeani Atlantik. Si pasojë, niveli i ujit ra me rreth 70%, duke e kthyer Mesdheun në dy liqene të kripura të ndara nga një urë toke që lidhte Italinë me Afrikën e Veriut.
Studimi, i publikuar në “Nature Communications”, tregon se gjatë një periudhe prej afro 700 mijë vitesh, një milion kilometra kub kripë u depozitua në fundin e basenit të Mesdheut. Shkencëtarët analizuan izotopet e klorit për të kuptuar ritmin e tharjes. Pasi u ndal rrjedha e ujit, niveli i detit ra deri në 2 kilometra, duke tharë 83% të vëllimit të tij. Ky proces apokaliptik u ndal vetëm pas “mega përmbytjes Zanklin”, kur Atlantiku hapi rrugën dhe mbushi Mesdheun me ujë, duke rritur nivelin me 10 metra në ditë.