Më shumë se 25 vite pas premierës, seriali kult The Sopranos vazhdon të ndezë debate, këtë herë jo për mafien, por për politikën.
Aktori Michael Imperioli, i njohur për rolin e Kristofer Moltisantit, ka habitur publikun me një deklaratë të fortë: nëse seriali do të xhirohej sot, shumë nga personazhet – përfshirë edhe Toni Soprano – mund të ishin mbështetës të Donald Trump.
Në një intervistë të fundit, Imperioli theksoi se seriali në thelb flet për ëndrrën amerikane, sidomos përmes syve të emigrantëve italianë.
“Sot do të ishte shumë interesante të shihej si do të përballeshin këta personazhe me klimën aktuale politike në SHBA. Shumë prej tyre ndoshta do të ishin votues të Trump-it dhe kjo është ironike,” u shpreh ai.
Ai rikujtoi se italianët që emigruan në SHBA dikur përballeshin me paragjykime dhe shpesh nuk kishin dokumente një realitet që bie ndesh me retorikën e sotme kundër emigrantëve.
The Sopranos (1999–2007) konsiderohet si një nga serialet më të rëndësishëm të të gjitha kohërave, duke hapur rrugën për produksione si Mad Men dhe Breaking Bad.
Historia e Tonit (i luajtur nga i ndjeri James Gandolfini) një bos mafie që përballet me ankth dhe probleme familjare – vazhdon të mbetet një reflektim i errët, por realist i shoqërisë amerikane.
Gjatë pandemisë, Imperioli së bashku me kolegët e tij rikthyen interesin për serialin përmes podcast-it “Talking Sopranos”, i cili u bë shumë i ndjekur nga fansat që e rishikonin serialin “për herë të miliontë”.
“Është e çuditshme që një serial për kriminelë dhe narkomanë konsiderohet ‘ushqim për shpirtin’, por për shumë njerëz është pjesë e kujtimeve familjare,” tha ai.
Deklarata e Imperiolit ka hapur një debat të ri:
A do të ishin mafiozët e Nju Xhersit pjesë e lëvizjes MAGA sot?
Një gjë është e sigurt – edhe pas më shumë se dy dekadash, “Sopranot” vazhdojnë të jenë aktuale dhe provokuese.