Një shpërthim i rasteve të virusit HMPV (Human Metapneumovirus) në veri të Kinës ka shkaktuar një valë shqetësimi, por ekspertët sigurojnë se rreziku për një pandemi të ngjashme me atë të COVID-19 është i ulët. HMPV është një sëmundje respiratore që shkakton simptoma të ngjashme me gripin ose të ftohtin, por mund të sjellë komplikacione më serioze si bronkiti dhe pneumonia, sidomos tek të moshuarit, fëmijët e vegjël dhe personat me sistem imunitar të dobësuar. Kjo sëmundje, e cila bën pjesë në të njëjtën familje me virusin sincicial respirator (RSV), u identifikua për herë të parë në vitin 2001 në Holandë dhe zakonisht është më i përhapur gjatë stinës së ftohtë.
Pse HMPV po përmendet në media?
Sipas autoriteteve lokale në Kinë, numri i rasteve të HMPV ka filluar të rritet, veçanërisht tek fëmijët. Qendra Kineze për Kontrollin dhe Parandalimin e Sëmundjeve (CDC) ka paralajmërur qytetarët të zbatojnë masat e higjienës dhe të kujdesen për shëndetin e tyre, por ka mohuar lajmet e qarkulluara në internet se spitalet janë tejmbushur ose se ekziston rreziku për një pandemi të re.
Sa i rrezikshëm është HMPV?
Simptomat e HMPV janë të ngjashme me ato të gripit ose të ftohtit të zakonshëm dhe shpesh konsiderohen si infeksione të lehta respiratore. Sipas dr. Stevens, kjo sëmundje nuk është e detyrueshme të raportohet tek autoritetet shëndetësore, pasi është e zakonshme dhe prek një pjesë të madhe të popullsisë. “Ka shumë viruse të tjera që nuk raportohen, sepse janë të përhapura dhe zakonisht shkaktojnë simptoma të lehta. Me pak pushim dhe kujdes, shumica e njerëzve rikuperohen shpejt,” shton ai.
Kush është më i rrezikuar?
Personat më të rrezikuar nga komplikimet serioze të HMPV janë të moshuarit, fëmijët e vegjël dhe ata me sistem imunitar të dobësuar. Profesor Paul Griffin, drejtor i sëmundjeve infektive në Shërbimin Shëndetësor Mater në Brisbane, thekson se ky virus mund të shkaktojë sëmundje serioze, ndaj është e rëndësishme që publiku të jetë i informuar mbi praninë e tij. Aktualisht, nuk ka vaksina apo medikamente specifike antivirale për trajtimin e HMPV, megjithëse po punohet për zhvillimin e tyre.
A ka arsye për shqetësim?
Edhe pse HMPV nuk është një virus i ri dhe ka dekada që është i pranishëm, kjo do të thotë se shumica e popullsisë botërore ka zhvilluar një nivel të caktuar imuniteti nga infeksionet e kaluara. Ndryshe nga COVID-19, i cili ishte një virus krejtësisht i ri për sistemin imunitar të njeriut, HMPV nuk ka potencialin të shkaktojë një pandemi të ngjashme. “Nuk mendoj se duhet të shqetësohemi për një pandemi nga HMPV, por rritja e rasteve dhe ndikimi i tij nuk duhen injoruar,” deklaroi Griffin. “Nga pandemia e COVID-19 kemi mësuar se si të ulim përhapjen e viruseve, sidomos kur nuk kemi ende vaksina apo trajtime specifike.”
Ekspertët gjithashtu theksojnë se duket sikur numri i rasteve po rritet, pjesërisht falë teknologjive më të avancuara që mundësojnë zbulimin dhe identifikimin e HMPV më shpejt se më parë. “Tani jemi më vigjilentë ndaj shpërthimeve të epidemive,” tha dr. Jacqueline Stevens, pedagoge në Universitetin Flinders të Australisë. “Njerëzit janë bërë më të kujdesshëm dhe vetë termi “Human Metapneumovirus” tingëllon mjaft frikësues.”