Benny Blanco u ka dhënë fansave një vështrim të rrallë nga festimet e 34-vjetorit të bashkëshortes së tij, Selena Gomez. Producenti publikoi një video nga udhëtimi i tyre romantik në Itali, ku çifti mori pjesë në një kurs gatimi dhe përgatiti së bashku një gosti tradicionale italiane.
Në pamje, Gomez shihet duke punuar brumin dhe duke përgatitur makarona të freskëta, ndërsa Blanco merret me lule kungulli të mbushura me djathë. Në menunë e ditëlindjes nuk mungoi as parmigiana me patëllxhan, të cilën producenti e cilësoi si gjënë më të mirë që kishte shijuar gjatë qëndrimit në Itali.
Videoja tregoi edhe çaste të ëmbla mes çiftit, nga dollitë dhe batutat në kuzhinë deri te pamjet piktoreske të fshatit italian. Në fund, Blanco iu drejtua Gomez me një urim të përzemërt, duke i shprehur dashurinë teksa ajo pushonte pas kursit të gatimit.
Një ditë më herët, çifti kishte darkuar në një restorant në Bolonjë, ku pronari dhe stafi i përshkruan si njerëz të sjellshëm, të dashur dhe plot komplimente për ushqimin e shërbimin. Gomez dhe Blanco u martuan në shtator të vitit 2025, pas rreth dy vitesh lidhjeje publike.