Babai i këngëtares legjendare, Mitch Winehouse, ka humbur një proces gjyqësor në Londër kundër dy mikeve të afërta të vajzës së tij, të cilat ai i akuzonte se kishin përfituar nga shitja e sendeve personale të saj. Çështja lidhej me ankande të organizuara në SHBA në vitet 2021 dhe 2023, ku u shitën dhjetëra objekte të artistes, përfshirë veshje dhe aksesorë, që sollën mbi 1 milion dollarë.
Megjithatë, gjykata vendosi në favor të mikeve të saj, duke pranuar argumentin se shumë prej këtyre sendeve ishin dhurata nga vetë Amy Winehouse ose prona e tyre personale. Gjykatësja kritikoi Mitch Winehouse, duke e cilësuar si dëshmitar jo të besueshëm dhe duke theksuar se padia nuk ishte e bazuar siç duhet. Vendimi përfundimtar i pastroi plotësisht të akuzuarat nga çdo keqbërje.