Shkencëtarët që përdorin teleskopët e NASA-s dhe Agjencisë Hapësinore Evropiane kanë zbuluar një sistem të pazakontë planetar rreth 116 vite dritë larg Tokës. Përreth një ylli të vogël të quajtur LHS 1903 rrotullohen katër planeta të vendosur në një renditje që kundërshton modelin e njohur të sistemeve planetare: planeti më i afërt është shkëmbor, dy të mesmit janë gjigantë të gaztë dhe planeti më i largët është sërish shkëmbor. Ky zbulim bie ndesh me teorinë klasike që thotë se planetët shkëmborë formohen afër yllit, ndërsa planetët me gaz krijohen më larg, ku temperaturat janë më të ulëta.
Planeti i jashtëm, LHS 1903 e, është më i madh se Toka, por me përbërje të ngjashme. Ajo që habit astronomët është se si një planet shkëmbor është formuar kaq larg yllit të vet. Sipas autorëve të studimit të publikuar në revistën Science, planetët e këtij sistemi janë formuar në mjedise të ndryshme dhe në periudha të ndryshme kohore. Mekanizmi më i mundshëm është ai i “formimit me pakësim të gazit”, ku planetët krijohen një nga një, duke filluar nga brendësia e sistemit drejt skajeve të tij. Kjo nënkupton se planeti i jashtëm është formuar shumë më vonë, në një kohë kur në diskun rreth yllit kishte mbetur shumë pak gaz për të krijuar një gjigant të ri planetar. Ky zbulim mund të ndryshojë mënyrën si e kuptojmë formimin e planeteve rreth yjeve më të zakonshëm në Galaksi dhe hap rrugën për studime të reja mbi atmosferat dhe evolucionin e tyre.