Apple ka rimarrë vendin e parë si kompania me vlerën më të madhe në botë, duke kaluar Nvidia-n. Ky zhvillim tregon se investitorët po shohin gjithnjë e më shumë potencialin e inteligjencës artificiale përtej prodhimit të çipave.
Sipas raportimeve, vlera e tregut e Apple ka arritur në rreth 4.88 trilionë dollarë, ndërsa Nvidia renditet e dyta me rreth 4.86 trilionë dollarë.
Analistët vlerësojnë se avantazhi kryesor i Apple qëndron te ekosistemi i saj i integruar. Pritshmëritë janë që versioni i ri dhe më i avancuar i asistentit virtual Siri të nxisë një valë të re blerjesh dhe përditësimesh të pajisjeve Apple.
Nga ana tjetër, Nvidia vazhdon të dominojë infrastrukturën globale të inteligjencës artificiale përmes çipave të saj, por konkurrenca po bëhet gjithnjë e më e fortë. Një shembull është suksesi i chatbot-it kinez Kimi, i zhvilluar nga kompania Moonshot AI.
Ekspertët theksojnë se vlera ekonomike e krijuar nga inteligjenca artificiale nuk po përqendrohet më vetëm te prodhuesit e çipave, por po zhvendoset gjithnjë e më shumë drejt modeleve të AI-së, aplikacioneve dhe pajisjeve që përdoren nga konsumatorët.