Albumi legjendar “Back to Black” i Amy Winehouse do të rikthehet në një edicion të veçantë për të shënuar 20-vjetorin e publikimit. Universal Music dhe Island Records kanë njoftuar se versionet e reja do të dalin më 23 tetor 2026 dhe do të përmbajnë materiale të papublikuara më parë.
Edicioni special do të sjellë demo të rralla, këngë bonus, fotografi të papublikuara dhe regjistrimin e plotë të koncertit të Winehouse në Paradiso të Amsterdamit, të mbajtur më 8 shkurt 2007. Mes materialeve të reja është edhe demoja “Tears Dry (Alternative Demo)”. Albumi origjinal, i publikuar në vitin 2006, u bë një nga albumet më të suksesshme të artistes dhe i hapi rrugën triumfit të saj me pesë çmime Grammy.