Drejtori i OpenAI, Sam Altman, ka pranuar publikisht se kompanitë kineze kanë bërë një përparim të jashtëzakonshëm në fushën e inteligjencës artificiale, duke theksuar se hendeku mes Lindjes dhe Perëndimit po zvogëlohet me shpejtësi.
Në një intervistë për CNBC, Altman foli për rritjen e fuqishme të teknologjisë kineze, duke përmendur edhe rastin e startup-it DeepSeek, i cili një vit më parë tronditi industrinë globale me modelin e tij AI, jo vetëm për performancën, por edhe për koston shumë më të ulët të trajnimit krahasuar me rivalët perëndimorë.
SHBA dhe Kina po konkurrojnë për arritjen e të ashtuquajturës Inteligjencë e Përgjithshme Artificiale (AGI), momenti kur AI do të arrijë ose tejkalojë inteligjencën njerëzore.
Altman theksoi se progresi kinez nuk kufizohet vetëm në AI, por edhe në sektorë të tjerë teknologjikë, ku në disa raste kompanitë kineze pothuajse kanë arritur nivelin e rivalëve amerikanë.
Ndërkohë, presidenti i Microsoft, Brad Smith, paralajmëroi se kompanitë amerikane duhet të jenë “pak të shqetësuara”, duke përmendur mbështetjen e fortë shtetërore që qeveria kineze u jep firmave të AI.
Altman foli edhe për planet e OpenAI për dalje në bursë (IPO). Për të tërhequr investitorë, kompania po kërkon të forcojë modelin e saj të biznesit.
Pas të ardhurave nga abonimet, OpenAI ka paralajmëruar mundësinë e futjes së reklamave në versionin falas dhe atë bazik të ChatGPT, një hap që mund të mos jetë i popullarizuar, por që shihet si i nevojshëm për të mbuluar kostot e larta të zhvillimit të AI.
Nëse IPO realizohet me sukses, vlera e OpenAI mund të kalojë 1 trilion dollarë, duke e vendosur kompaninë në mesin e gjigantëve më të mëdhenj teknologjikë në botë.