Regjisori amerikan Alexander Payne do të kryesojë jurinë kryesore të edicionit të sivjetëm të Festivalit të Filmit në Venecia, njoftuan organizatorët. Filmat e tij, si “The Holdovers”, “Sideways” dhe “The Descendants”, kanë marrë gjithsej 24 nominime për Oscar, përfshirë katër për filmin më të mirë dhe tre për regjisorin më të mirë. Payne ka fituar dy herë çmimin për skenarin më të mirë të adaptuar.
“Është një nder dhe kënaqësi e madhe të jem pjesë e jurisë në një festival që prej gati një shekulli feston filmin si art”, deklaroi Payne.
Festivali i 82-të i Filmit në Venecia do të mbahet nga 27 gushti deri më 6 shtator në ishullin Lido, ndërsa lista e filmave në konkurrencë pritet të publikohet në korrik. Kujtojmë se në vitin 2017, komedia e Payne “Downsizing” hapi edicionin e atëhershëm të festivalit.