Një studim i publikuar në British Journal of Psychology ka zbuluar se disa persona kanë aftësi të jashtëzakonshme për të dalluar fytyrat e krijuara nga Inteligjenca Artificiale (AI) nga ato reale. Këta individë quhen “super-njohës” dhe arrijnë të identifikojnë fytyrat e gjeneruara nga AI me saktësi dukshëm më të lartë se njerëzit e zakonshëm.
Hulumtimi u realizua nga studiues të Universitetit të Uellsit të Ri Jugor në Sidnej dhe Universitetit Kombëtar Australian. Në testin online morën pjesë 125 persona, prej të cilëve 36 u klasifikuan si super-njohës. Pjesëmarrësve iu shfaqën imazhe fytyrash dhe u kërkua të përcaktonin nëse bëhej fjalë për persona realë apo për imazhe të krijuara nga AI.
Rezultatet treguan se super-njohësit ishin mesatarisht 35 për qind më të saktë në dallimin e fytyrave artificiale krahasuar me pjesëmarrësit e tjerë. Në përgjithësi, ata arritën të identifikonin saktë fytyrat e gjeneruara nga AI në mbi 57 për qind të rasteve.
Sipas studiuesve, një nga arsyet kryesore të suksesit të tyre është aftësia për të vënë re detaje të vogla dhe mungesën e tipareve unike personale. Fytyrat e krijuara nga AI shpesh paraqesin tipare shumë simetrike dhe “perfekte”, por u mungon individualiteti që karakterizon fytyrat reale, gjë që mund të perceptohet si diçka jo plotësisht natyrale.
Ky studim vjen në një kohë kur teknologjia e inteligjencës artificiale po zhvillohet me shpejtësi dhe po përdoret gjithnjë e më shumë për krijimin e imazheve realiste, duke ngritur edhe shqetësime për manipulimin e përmbajtjes vizuale dhe dezinformimin.