Mungesa e vullnetit dhe lodhja mund të mos jenë gjithmonë vetëm pasojë e stresit. Një studim i realizuar nga studiuesit e Universitetit Metropolitan të Osakës sugjeron se vitamina B12 dhe folati, i njohur si vitamina B9, mund të kenë lidhje me motivimin dhe nivelin e energjisë.
Studiuesit analizuan të dhënat e 602 të rriturve të shëndetshëm. Te gratë, niveli më i lartë i homocisteinës, që shpesh shoqërohet me nivele më të ulëta të B12 dhe folatit, u lidh me mungesë më të madhe motivimi. Te burrat, ndërkaq, u vu re lidhje më e fortë me lodhjen fizike.
Megjithatë, studimi tregon vetëm një lidhje dhe nuk dëshmon se mungesa e këtyre vitaminave shkakton drejtpërdrejt mungesën e motivimit. Folati gjendet në spinaq, shparguj, bishtajore dhe perime të gjelbra, ndërsa vitamina B12 kryesisht në mish, peshk, vezë dhe produkte të qumështit. Nëse lodhja dhe mungesa e motivimit vazhdojnë, këshillohet konsultimi me mjekun përpara përdorimit të suplementeve.