Shtatori mund të jetë një nga periudhat më të mira të vitit për të nisur një projekt të ri, për të ndryshuar zakonet apo për t’iu përkushtuar më seriozisht një qëllimi. Psikologët këtë fenomen e quajnë “efekti i fillimit të ri”, momentet që shënojnë një kufi të ri kohor na krijojnë ndjesinë se po lëmë pas një version të vjetër të vetes dhe po fillojmë nga e para.
Edhe pse ky fenomen lidhet shpesh me Vitin e Ri, ekspertët thonë se shtatori mund të ketë një ndikim po aq të fuqishëm, madje për disa njerëz edhe më të madh se janari. Arsyeja lidhet me vitet e shkollimit: që nga fëmijëria jemi mësuar ta lidhim shtatorin me kthimin në shkollë, detyrimet, mësimin dhe vendosjen e objektivave të reja. Kjo ndjesi mund të vazhdojë edhe në moshën e rritur.
Edhe ndryshimi i stinës luan rol. Pushimet verore përfundojnë, temperaturat fillojnë të bien dhe njerëzit gradualisht kthehen në rutinën e përditshme. Për prindërit, rikthimi i fëmijëve në shkollë mund të sjellë gjithashtu një organizim të ri të ditës dhe nevojën për një rutinë më të strukturuar.
Sipas ekspertëve, të gjitha këto ndryshime krijojnë kushte të favorshme psikologjike për të thënë “po filloj nga e para”. Prandaj, shtatori mund të jetë momenti ideal për të nisur aktivitet fizik, për të ndryshuar mënyrën e ushqyerjes, për të filluar një projekt të ri, për t’u përqendruar më shumë në karrierë apo thjesht për t’iu rikthyer një qëllimi që e kemi lënë përgjysmë.