Rezervuarët në mbarë botën po humbasin mesatarisht 7.3 për qind të kapacitetit të tyre çdo dhjetë vjet për shkak të grumbullimit të sedimenteve. Një studim i publikuar në revistën “Nature Sustainability” paralajmëron se, pa masa të menjëhershme, më shumë se gjysma e tyre mund të bëhen jofunksionale deri në vitin 2060.
Shkencëtarët analizuan mbi 550 mijë rezervuarë, duke përdorur imazhe satelitore, të dhëna gjeografike dhe dokumentacion inxhinierik. Më shumë se 95 për qind e tyre kanë sipërfaqe më të vogël se një kilometër katror dhe zakonisht nuk janë përfshirë në analizat e mëparshme.
Rezervuarët janë jetikë për furnizimin me ujë, ujitjen e tokave bujqësore, mbrojtjen nga përmbytjet dhe prodhimin e energjisë elektrike. Megjithatë, sedimentet që grumbullohen pas digave e zvogëlojnë gradualisht kapacitetin e tyre dhe kërcënojnë sigurinë afatgjatë të ujit, ushqimit dhe energjisë.
Sipas studimit, pothuajse një në pesë rezervuarë tashmë po humb kapacitet me ritme të shpejta. Më të rrezikuarit ndodhen në zonat e thata, përfshirë jugperëndimin e Shteteve të Bashkuara, Lindjen e Mesme dhe Australinë Perëndimore.
Rreth një e katërta e sipërfaqeve bujqësore të ujitura në botë, prej të cilave varen më shumë se dy miliardë njerëz, gjendet në zonat me rrezik të lartë. Studiuesit kërkojnë menaxhim më të qëndrueshëm të rezervuarëve për të parandaluar pasoja serioze në furnizimin me ujë dhe prodhimin e ushqimit.