Dua Lipa ka ndarë me ndjekësit emocionet e saj për rikthimin në Prishtinë. Këngëtarja publikoi një seri fotografish nga vizita në hapësirën e festivalit dhe shkroi se mezi pret nisjen e një tjetër edicioni, duke u shprehur krenare për familjen dhe gjithë ekipin që punon prej muajsh për organizimin e ngjarjes.
“Jemi rikthyer! Nuk mund ta besoj se do të nisim edicionin e shtatë të Sunny Hill Festival. Zbrita mbrëmë në vendin e festivalit për të parë gjithçka para se të fillojë sot dhe jam jashtëzakonisht e emocionuar. Ndihem shumë krenare për familjen tonë dhe gjithë ekipin që e ka bërë të mundur këtë,” shkroi Dua Lipa.
Në fund të mesazhit, ajo iu drejtua publikut me fjalët: “Shihemi sonte, Prishtinë!”, duke rritur edhe më shumë entuziazmin e fansave që do të ndjekin festivalin.