Fotografia më e komentuar para finales së Kupës së Botës mes Argjentinës dhe Spanjës nuk është realizuar gjatë turneut. Ajo daton në vitin 2007 dhe tregon Lionel Messin, atëherë 20 vjeç, duke mbajtur dhe larë një foshnjë pesëmuajshe që sot njihet nga e gjithë bota si Lamine Yamal.
Pothuajse 19 vjet më vonë, dy protagonistët e fotografisë do të gjenden përballë njëri-tjetrit në finalen e Botërorit. Messi do të udhëheqë Argjentinën, ndërsa Yamal do të jetë një nga shpresat kryesore të Spanjës në ndeshjen që do të zhvillohet të dielën, më 19 korrik.
Historia e fotografisë nisi gjatë një aktiviteti bamirës të organizuar nga fondacioni i Barcelonës, gazeta Diario Sport dhe UNICEF-i. Futbollistët e ekipit të parë pozonin me fëmijë të përzgjedhur për një kalendar humanitar, ndërsa familjes së Yamalit i ishte caktuar pikërisht Messi.
Fotografi Joan Monfort ka treguar se Messi ishte shumë i turpshëm dhe në fillim nuk dinte si të sillej me foshnjën në vaskën e vogël plastike. Askush në atë kohë nuk mund ta parashikonte se i riu argjentinas do të bëhej një nga futbollistët më të mëdhenj të historisë dhe se foshnja në krahët e tij do të shndërrohej në një nga talentet më të mëdha të brezit të ri.
Fotografitë qëndruan pothuajse të harruara për më shumë se 16 vjet. Ato u rikthyen në vëmendjen e publikut gjatë Kampionatit Evropian të vitit 2024, kur babai i Yamalit publikoi një prej tyre në rrjetet sociale me përshkrimin: “Fillimi i dy legjendave”.
Tashmë fotografia ka marrë një kuptim edhe më të veçantë. Nga një takim i rastësishëm për një kalendar bamirës, ajo është shndërruar në simbolin e bashkimit të dy brezave të futbollit: Messit, kampionit dhe legjendës së Barcelonës, dhe Yamalit, trashëgimtarit të fanellës me numrin 10 në klubin katalanas.
Argjentina siguroi finalen pas fitores dramatike 2-1 ndaj Anglisë, me Messin që asistoi në të dy golat e përmbysjes. Spanja, ndërkohë, eliminoi Francën me rezultatin 2-0 dhe vazhdon turneun si një nga skuadrat më të forta në mbrojtje.
Pothuajse dy dekada pasi Messi e mbante Yamal-in foshnjë në krahë, ata do të takohen përsëri në skenën më të madhe të futbollit. Këtë herë jo përpara aparatit fotografik, por si kundërshtarë në një finale të Kupës së Botës.