Një halë peshku mund të duket si një bezdi e vogël gjatë ngrënies, por në disa raste ajo mund të shkaktojë komplikime serioze, madje edhe kërcënuese për jetën. Mjekët paralajmërojnë se një halë e ngecur në fyt nuk duhet nënvlerësuar, pasi mund të dëmtojë indet, të shkaktojë infeksione apo të kërkojë ndërhyrje urgjente.
Sipas mjekëve, halat e peshkut janë ndër arsyet më të shpeshta pse pacientët paraqiten në urgjencë me një trup të huaj të ngecur në fyt. Ato mund të mbeten në bajame, në pjesën e pasme të gojës, në ezofag ose në zona të tjera të fytit.
Çfarë duhet të bëni?
Mjekët rekomandojnë që fillimisht të provoni të kolliteni fort, pasi në disa raste kjo mund ta nxjerrë halën.
Megjithatë, nuk këshillohet të provoni ta shtyni poshtë duke ngrënë bukë, banane apo ushqime të tjera, siç sugjerojnë disa metoda popullore. Nuk ka prova shkencore që kjo funksionon dhe, përkundrazi, mund ta shtyjë halën më thellë ose ta përkeqësojë situatën.
Nëse dhimbja vazhdon, keni vështirësi në gëlltitje ose ndjeni se hala nuk është larguar, duhet të paraqiteni sa më shpejt te mjeku. Në shumë raste, ajo hiqet me endoskopi, pa pasur nevojë për intervenim kirurgjik.