Pas më shumë se 25 vitesh, Nicole Kidman dhe Sandra Bullock rikthehen në rolet e motrave magjistare Sally dhe Gillian Owens në filmin “Practical Magic 2”, vazhdimin e shumëpritur të filmit kult të vitit 1998. Studio Warner Bros. ka publikuar trailerin e parë, duke zbuluar se motrat do të përpiqen t’i japin fund një mallkimi familjar që prej brezash ua pamundëson grave të familjes të gjejnë dashurinë e përjetshme.
Në vazhdim, historia fokusohet edhe te brezi i ri i familjes Owens. Vajza e Sally-t, Kylie, e luajtur nga Joey King, nis të besojë se mallkimi është ende aktiv pasi i dashuri i saj pëson një aksident të rëndë. Kjo i shtyn motrat Owens të nisin një udhëtim për të gjetur një zgjidhje dhe për të thyer njëherë e përgjithmonë mallkimin.
Filmi sjell edhe emra të rinj në kast, si Maisie Williams, Xolo Maridueña dhe Lee Pace, ndërsa skenari është shkruar nga Akiva Goldsman, bashkautor i filmit origjinal, dhe Georgia Pritchett. Përveç roleve kryesore, Sandra Bullock dhe Nicole Kidman janë edhe producente të filmit.
“Practical Magic 2” shënon gjithashtu rikthimin e Sandra Bullock në ekranin e madh, pas një pauze nga aktrimi që nga viti 2022. Filmi pritet të rikthejë atmosferën magjike dhe lidhjen e fortë familjare që e bënë origjinalin një klasik të dashur për publikun.