Komedi romantike “Voicemails for Isabelle” është kthyer në një nga filmat më të ndjekur të Netflix, por pak e dinë se historia e tij bazohet në përvojën personale të regjisores dhe skenaristes Leah McKendrick.
Filmi ndjek historinë e Jill, e cila pas vdekjes së motrës së saj vazhdon t’i lërë mesazhe zanore në telefon. Pa e ditur, numri i motrës i është dhënë një të riu, i cili dëgjon rrëfimet e saj dhe gradualisht bie në dashuri me të.
McKendrick ka treguar se ideja lindi pas një shfaqjeje stand-up, ndërsa më vonë u frymëzua nga zakoni i saj për t’i dërguar motrës mesazhe të gjata zanore kur ajo u shpërngul për studime.
“Po të dëgjonte dikush versionin tim më të sinqertë dhe të pafiltruar dhe të dashurohej me të, atëherë ajo do të ishte dashuri e vërtetë”, u shpreh regjisorja.
Ajo theksoi se filmi nuk është vetëm një histori romantike, por edhe një letër dashurie për motrën e saj dhe një homazh për lidhjen e fortë familjare që e frymëzoi të shkruante këtë histori.