Donald Trump Jr. dhe Bettina Anderson kanë festuar martesën e tyre me një ceremoni intime në Bahamas, të organizuar në një ishull privat mes familjarëve dhe miqve të afërt. Çifti ishte martuar ligjërisht disa ditë më parë në Florida, ndërsa ceremonia festive u mbajt gjatë fundjavës.
Në dasmë morën pjesë rreth 40 të ftuar, përfshirë Ivanka Trump, Eric Trump dhe Tiffany Trump me partnerët e tyre, si dhe pesë fëmijët e Donald Trump Jr. nga martesa e mëparshme. Sipas mediave amerikane, ceremonia ishte shumë më private se dasmat e mëparshme të familjes Trump, të cilat zakonisht organizoheshin në Mar-a-Lago.
Presidenti Donald Trump nuk mori pjesë në ceremoninë në Bahamas, duke deklaruar se angazhimet shtetërore dhe situata ndërkombëtare nuk ia lejuan udhëtimin. Çifti u fejua në fund të vitit 2025 pas rreth një viti lidhjeje.