Instagram ka çaktivizuar globalisht funksionin e enkriptimit “end-to-end” për mesazhet private, duke shënuar një ndryshim të madh në qasjen e Meta ndaj privatësisë së përdoruesve. Ky lloj enkriptimi lejonte që vetëm dërguesi dhe marrësi të kishin qasje në përmbajtjen e mesazheve, pa mundësi leximi nga platforma apo palë të treta.
Pas këtij ndryshimi, Instagram do të ketë mundësi të qaset në përmbajtjen e mesazheve direkte, përfshirë fotografitë, videot dhe mesazhet zanore. Meta kishte premtuar që nga viti 2019 zgjerimin e kësaj teknologjie në Facebook dhe Instagram, por tani ka vendosur të mos e vazhdojë më përdorimin e saj në Instagram, duke përmendur përdorimin e ulët nga ana e përdoruesve.
Ekspertët e sigurisë kibernetike paralajmërojnë se ky vendim mund të ndikojë në privatësinë online, sidomos në kohën kur kompanitë teknologjike po fokusohen gjithnjë e më shumë në zhvillimin e inteligjencës artificiale dhe përdorimin e të dhënave për reklama të personalizuara. Aktualisht, aplikacione si WhatsApp, Signal dhe Facebook Messenger vazhdojnë të ofrojnë enkriptim “end-to-end” si standard për komunikimin privat.