Një grua nga Pensilvania ka gjetur një diamant të bardhë prej 3.09 karatësh në parkun shtetëror “Crater of Diamonds” në Arkansas, vetëm disa javë pasi humbi djalin dhe babain e saj. Keshia Smith tha se udhëtimi ishte planifikuar prej më shumë se një viti, por pas tragjedive familjare u kthye në një mënyrë për të gjetur pak qetësi dhe shpresë.
Diamanti, i cili ka formë të ngjashme me zemrën, është një nga zbulimet më të mëdha të regjistruara këtë vit në park. Smith e quajti gurin “Za’Novia Liberty Diamond”, në nder të nipërve të saj dhe 250-vjetorit të SHBA-së. Ajo u shpreh se gjetja e diamantit ishte një moment emocional dhe një shenjë shprese pas muajve të vështirë që kishte kaluar.