Google po sjell një opsion të shumëpritur që u mundëson përdoruesve të ndryshojnë adresën e tyre Gmail pa qenë nevoja të fshijnë llogarinë dhe të krijojnë një të re. Ky përditësim vjen si një lehtësim i madh për ata që kanë adresa të vjetra ose të papërshtatshme dhe duan një identitet më profesional. Funksioni po shpërndahet gradualisht, ndaj mund të mos jetë ende i disponueshëm për të gjithë.
Për ta ndryshuar adresën, përdoruesit duhet të hyjnë në cilësimet e llogarisë, te seksioni “Të dhënat personale”, pastaj “E-mail” dhe të zgjedhin opsionin për ndryshimin e adresës. Pas konfirmimit, adresa e re bëhet primare, ndërsa e vjetra mbetet si alternative për marrjen e mesazheve. Të dhënat si email-et, fotot dhe kontaktet nuk preken, megjithatë rekomandohet krijimi i një kopjeje rezervë për çdo rast.