Gjithnjë e më shumë të rinj po përdorin inteligjencën artificiale për të shkruar mesazhe, për të përfunduar marrëdhënie apo për të interpretuar emocionet e të tjerëve. Ekspertët paralajmërojnë se kjo praktikë mund të ndikojë negativisht në zhvillimin e aftësive sociale dhe të rrisë ndjenjën e izolimit.
Sipas studimeve të fundit, shumë të rinj i drejtohen chatbotëve për t’i ndihmuar të formulojnë mesazhe të vështira ose për të analizuar situata emocionale. Një rast i tillë është edhe ai i një studenti që përdori ChatGPT për të shkruar një mesazh refuzimi pas një takimi, sepse ndjente pasiguri se si të shprehej vetë.
Studiuesit e quajnë këtë fenomen “delegim social” kur njerëzit ua lënë inteligjencës artificiale komunikimin në situata personale. Problemi, sipas ekspertëve, është se kjo mund të krijojë një hendek mes asaj që një person ndjen dhe mënyrës si shprehet, pasi mesazhi formulohet nga AI dhe jo nga vetë individi.
Hulumtimet tregojnë gjithashtu se rreth një e treta e adoleshentëve preferojnë të flasin me inteligjencën artificiale për tema serioze, në vend që t’i diskutojnë ato me njerëz realë.
Psikologët paralajmërojnë se përdorimi i shpeshtë i AI për komunikim mund të ngadalësojë zhvillimin emocional, të ulë vetëbesimin në shprehjen e mendimeve dhe të vështirësojë aftësinë për të kuptuar sinjalet sociale.
Megjithatë, ekspertët theksojnë se këto aftësi mund të zhvillohen me praktikë dhe këshillojnë të rinjtë që, në vend të inteligjencës artificiale, t’i drejtohen miqve, familjes dhe njerëzve të afërt kur përballen me biseda të vështira.