Një zhvillim i jashtëzakonshëm në fushën e robotikës së ndërtimit po ndryshon mënyrën si ndërtohen shtëpitë. Inxhinierë nga Crest Robotics dhe Earthbuilt Technology në Australi kanë zhvilluar “Charlotte” një robot autonom me gjashtë këmbë, i aftë të 3D-printojë një shtëpi prej rreth 200 metrash katrorë brenda vetëm 24 orëve.
Robotit i është dhënë forma e një “merimange” gjigante dhe punon me një saktësi e shpejtësi që, sipas zhvilluesve, krahasohet me punën e 100 muratorëve. “Charlotte” mund të funksionojë pa ndërprerje dhe pa mbikëqyrje të vazhdueshme njerëzore, duke ulur ndjeshëm kostot e ndërtimit.
Ndërsa një shtëpi e përfunduar plotësisht me teknologji 3D mund të kushtojë mbi 150.000 dollarë për shkak të përfundimeve manuale, struktura bazë e printuar mund të realizohet me një kosto prej vetëm 4.000 deri në 10.000 dollarë, në varësi të modelit.
Një tjetër avantazh i madh është aspekti ekologjik. Robotët përdorin kompozite miqësore me mjedisin, të përbëra nga rërë lokale, xham i ricikluar dhe tulla të grimcuara duke reduktuar nevojën për beton tradicional dhe transport të rëndë.
Ndërkohë, në Teksas po ndërtohet komuniteti më i madh në botë me shtëpi të printuara 3D, ku çmimet për një shtëpi me tre dhoma gjumi arrijnë rreth 450.000 dollarë, me përfundime moderne dhe arkitekturë premium. Në Indi, kompani si Cretebots ofrojnë modele të ngjashme me kosto dukshëm më të ulët, mes 19.000 dhe 26.000 dollarë.