Kompozitori britanik Maks Richter është nderuar me çmimin prestigjioz “Berlinale Kamera” për kontribut të veçantë në artin filmik, gjatë ceremonisë së zhvilluar në kuadër të Festivalit Ndërkombëtar të Filmit në Berlin.
Në event ishte e pranishme edhe regjisorja fituese e çmimit Oscar, Chloé Zhao, me të cilën Richter ka bashkëpunuar së fundmi në dramën shekspiriane “Hamnet”.
“Muzika e Maksit ka një aftësi magjike për të më rikthyer në trupin tim. Ai di si ta mbajë tensionin në hapësirën mes ‘të qenit’ dhe ‘mosqenies’,” u shpreh Zhao gjatë ceremonisë.
Çmimi Berlinale Kamera jepet që nga viti 1986 në Festivalin e Filmit në Berlin dhe ndër fituesit e mëparshëm janë emra të mëdhenj si Isabella Rossellini, Meryl Streep dhe Richard Linklater.
Richter është nominuar për herë të parë për çmimin Oscar për muzikën e filmit “Hamnet”, i cili ka marrë gjithsej tetë nominime. Në këtë film luajnë Paul Mescal dhe Jessie Buckley.
Kompozitori është i njohur për kolonat zanore të filmave si “Waltz with Bashir” dhe “Ad Astra”, duke u dalluar për stilin e tij emocional dhe minimalist.
Gjatë fjalimit të tij, Richter theksoi se në procesin krijues i kushton vëmendje çdo detaji të vogël të tingullit:
“A komunikon sa më fuqishëm që mundet? A duket i pashmangshëm? Kërkoj atë ndjesi ‘kjo mund të ishte vetëm kështu’. Për ta arritur, shpesh hedh poshtë 90% të punës dhe mbaj vetëm thelbin.”