Anila Aliu, pianistja shqiptare nga Kosova, triumfon në konkurse ndërkombëtare.
Bëhet fjalë për pianisten 23-vjeçare nga Kosova, Anila Aliu, e cila po shkëlqen në skenën ndërkombëtare të muzikës klasike, duke fituar disa nga çmimet më prestigjioze në konkurse globale, transmeton albinfo.ch.
Së fundmi, ajo u shpall fituese e çmimit kryesor në një konkurs të nivelit të lartë në Tajlandë, ku konkurruan pianistë nga e gjithë bota. Ky sukses është rezultati i punës shumëvjeçare dhe kalimit të disa raundeve të vështira që nga viti 2020.
“Konkurenca ishte jashtëzakonisht e fortë, me pjesëmarrës nga të gjitha moshat dhe vende të ndryshme, por falë përkushtimit arrita të triumfoja”, tregoi Anila.
Pianistja ka ndarë gjithashtu lajmin për çmimin e fituar më parë në Beograd, duke theksuar se në muzikën klasike nuk ka rëndësi prejardhja, por vetëm talenti dhe ajo që ofron në skenë, transmeton ndërkaq albinfo.ch.
“Suksesi im më bën të ndihem e vlerësuar si artiste, sepse në këtë botë nuk ka rëndësi se nga vjen, por çfarë dhuron me performancën tënde”, tha Aliu, duke reflektuar për përpjekjet dhe pasionin që e kanë çuar deri në skenat ndërkombëtare.
Anila Aliu vazhdon të jetë një shembull frymëzimi për artistët e rinj shqiptarë, duke treguar se talenti dhe përkushtimi mund të tejkalojnë çdo kufi dhe të vendosin emrin e Kosovës në hartën e muzikës klasike botërore.