Dëmet më të mëdha u regjistruan në Qipro, Greqi, Maltë dhe Bullgari, ku secila prej tyre pësoi dëme afatshkurtra mbi 1% të vlerës bruto të shtuar për vitin 2024, një tregues i ngjashëm me PBB-në
Moti ekstrem që goditi Evropën këtë verë shkaktoi humbje ekonomike afatshkurtra prej të paktën 43 miliardë eurosh, me koston që parashikohet të arrijë në 126 miliardë euro deri në vitin 2029.
Vera e ashpër me thatësira dhe përmbytje i ka kushtuar ekonomisë së BE-së 0.26% të prodhimit vjetor në vitin 2024.
Dëmet më të mëdha u regjistruan në Qipro, Greqi, Maltë dhe Bullgari, ku secila prej tyre pësoi dëme afatshkurtra mbi 1% të vlerës bruto të shtuar për vitin 2024, një tregues i ngjashëm me PBB-në. Pas tyre renditen vendet e tjera mesdhetare si Spanja, Italia dhe Portugalia, shkruan Scan, transmeton albinfo.ch.
Ekonomistët nga Universiteti i Mannheim-it dhe Banka Qendrore Evropiane e përshkruan analizën si “konservatore”, pasi ajo nuk përfshin zjarret rekord që përfshinë Evropën Jugore muajin e kaluar, apo ndikimet e kombinuara nga ngjarje ekstreme të motit që ndodhin njëkohësisht.
Shkencëtarët po përpiqen të vlerësojnë se në çfarë mase ngrohja globale ka përkeqësuar motin ekstrem këtë verë, me studime që sugjerojnë se ndryshimet klimatike e bënë 40 herë më të mundshme përhapjen e nxehtësisë dhe zjarreve në Spanjë dhe Portugali, dhe 10 herë më të mundshme në Greqi dhe Turqi. Humbjet e jetëve nga vala e të nxehtit në qershor vlerësohen të jenë trefishuar në 12 qytete të mëdha, për shkak të ndotjes që ngroh planetin.
Ndërsa shumica e kërkimeve mbi kostot ekonomike të krizës klimatike fokusohet te ndikimet e drejtpërdrejta si dëmet materiale ose humbjet e siguruara, autorët e studimit të ri përdorën lidhje historike mes motit ekstrem dhe prodhimit ekonomik për të marrë parasysh efektet zinxhir. Ata konsideruan faktorë si orët e kufizuara të punës për ndërtuesit gjatë valëve të nxehta apo ndërprerjet e udhëtimeve.