Në fillim të dekadës, Mark Zuckerberg kishte plane për të prezantuar një orë inteligjente të kompanisë së tij, e njohur atëherë si projekt “Malibu”. Në atë kohë, kompania quhej ende Facebook dhe pajisja pritej të dilte në treg si “Facebook Watch”, me versione që do të funksiononin në Android ose në një sistem operativ të zhvilluar nga vetë kompania. Megjithatë, ndryshimet e mëdha strategjike përfshirë riemërtimin në Meta dhe zhvendosjen e fokusit drejt realitetit virtual bënë që projekti i orës të lihej në pritje, ndërsa miliarda dollarë u investuan në zhvillimin e teknologjive immersive.
Sot, me fokus të ri te inteligjenca artificiale dhe pas suksesit të syzeve inteligjente, Meta po shqyrton rikthimin në tregun e orëve inteligjente. Sipas raportimeve të fundit të publikuara nga The Information, kompania mund të prezantojë modelin e saj të parë që këtë vit, me theks të veçantë në asistentin me inteligjencë artificiale dhe funksione të avancuara për monitorimin e shëndetit. Përveç kësaj, Meta po punon edhe në modele të reja syzesh me realitet të shtuar dhe të përzier, teknologji që mund të luajnë rol kyç në të ardhmen dhe madje të sfidojnë dominimin e telefonave inteligjentë. Ende nuk ka konfirmim zyrtar, por pritshmëritë në treg janë në rritje.